第７４章でぃある
新たぬ決意ゆ胸んかい、まいゆ向きあい゜きぃ゜ぱずぃ゜みたい゜良作。
すすぃ゜てぃまたとぅきぃ゜ー流り・・・かりゃー、高校一年生んかいなりうたい゜。
良作ゆ取い゜巻きぃ゜「人間模様」がうぷふ変化っすぃ゜中、かいぬ母校でぃあるＫ小学校まい、うぷふ様変ばい゜っすぃ゜つぃ゜つぃ゜あい゜たい゜。
長らふ、地主とぅ市ぬ間しむみうたい゜問題ぬたみ、中断しーうたい゜新校舎ぬ建設工事ぬ前年、ようやふ前進っすぃ゜・・くぬ年、つぃ゜まい゜、1986年7月んみでぃたふ、完成ぬ日ゆ迎いたい゜。
良作が完成からすぃ゜ばらふしーから見ーが行きみーい゜とぅ・・・白亜はきぃ゜かぬ洋館ぬような、近代的でぃ清潔感あふれい゜、見事ぬ建物ぬ、かつぃ゜てぃ、荒り野し一面草ぼうぼうやたい゜敷地んかい、悠然とぅすびぃ゜い立つぃ゜、うぬ威容（うい゜よう）ゆ誇りうたい゜。
（かんしぬきぃ゜れい゜でぃ、立派ぬ校舎し学べい゜後輩ぬきゃーや、まーんてぃー恵まりうい゜やー・・・ばんたが校舎ー、雨漏い゜まい床ぬきぃ゜すぃ゜む゜まいすぃ゜ぐふたたい゜むんやー・・・。）
良作ー、かつぃ゜てぃどぅーぬ美絵子や理沙とぅ仲良ふ過ぐすぃ゜たい゜学びぃ゜舎やんかいまい、みーゆ向きみーたい゜。
あがたから眺みみーゃーまい・・・こうすぃ゜てぃずぃ゜っふい゜とぅ見ーみーい゜とぅ、百年以上ぬ風雨んかいさらさりたい゜校舎ぬ傷みぃ゜ぬ、てぃーんかいとぅい゜ようんかい分かい゜。
明治ぬ世から、昭和ぬんなまぬんなまがみ・・・多ふぬ在校生ゆ見守い゜、あみぬ日まいかじぬ日まい守りふぃー、巣立つぃ゜行きぃ゜卒業生ぬきゃーゆきぃ゜むかぎふ送い゜出しふぃーたい゜、ぬふふ、親すぃ゜みぃ゜とぅ思い゜出ぬい゜っぱい゜ぬ校舎まい・・・あとぅばずぃ゜かな期間し、良作ぬきゃーぬまいから、とぅりーてぃーにぃ゜姿ゆ消しゆきぃ゜ぬやん。
良作ー、くぬなつぃ゜かすぃ゜学びぃ゜舎ぬ取い゜壊さいい゜当日ー、のーがのーやらーまいくまんかいくーでぃ・・・すすぃ゜てぃどぅーぬ、うぬ最後ぬ「晴り姿」ゆ見届きでぃ・・・そう誓あい、家路んかい着きぃ゜たい゜ぬでぃあった。
