第４章でぃある
かりゃー、するばん塾ぬ嫌い゜でぃあった。
むとぅむとぅどぅーからすぃ゜すぃ゜み入塾っすぃ゜たい゜ばきやあらんすぃ゜、土日ん塾ぬやりうたい゜たみ、貴重ぬ休みぃ゜ぬ日ぬ半分近ふが、つぃ゜ぶさりすぃ゜まいばやん。
あすぃ゜が、塾外ぬ環境ーゆーどぅ気にぃ゜入りうたい゜。
塾ぬまーい゜ーちょっとぅすぃ゜た空きぃ゜地ぬようんかいなりうりやらびぬきゃぬあすぃ゜ぴぃ゜ぬ場んかいなりうたい゜すぃ゜、近ふんな何軒まいぬ駄菓子屋があい゜、良作まいすくでぃゆーどぅ菓子ゆ買いふぉーたい゜むぬやん。
月ん千円ぬ小遣い゜やたい゜かいが、すりふどぅ毎週菓子ゆふぉーくとーでぃきぃ゜ったんが、駄菓子屋んかい寄りさまざまぬう菓子や陳列つぃ゜んりつぃ゜しーあい゜水鉄砲などぅぬうむちゃ類ゆ眺みうい゜だきやらーまい、十分心ぬ栄養んかいない゜たい゜むぬやたい゜。
塾ぬ裏手ー、地域ぬ公民館んかいなりうい゜、すくんかい設置すーりたい゜長ベンチんかえー、するばんぬ「ノルマ」ゆ終いたい゜っふぁらがびし菓子ゆほおばい゜がつぃ゜な、ゆうび観ーたい゜ＴＶ番組やどぅーが好きぃ゜ぬアイドル歌手ぬぱなすぃ゜うっすぃ゜ぬでぃある。
やーどーＮＨＫぬ教育番組しか観ーみぃ゜しむれーったん良作ー、くまどぅアイドルやヒット曲、はやい゜ぬグッズやサブカルチャーにぃ゜関すぃ゜る貴重ぬ情報ゆ得うたい゜。
むつぃ゜るん、上級生・下級生まい含みどぅすぃ゜ぬひとぅい゜まいむたったんかいが、会話んかい参加っすぃ゜ぶっさぬまいでぃきぃ゜い゜むぬでーにゃーったんから、ぱなすぃ゜うっすぃ゜グループぬすばゆうろうるっすぃ゜がつぃ゜な、すりとぅなふ聞きぃ゜耳ゆ立てい゜てぃーあい゜スタイルし情報収集ゆ楽すぃ゜みうたい゜ぬでぃある。
良作ー、駄菓子屋ぬい゜ふつぃ゜かぬはすぃ゜向い゜んかいあい゜小さなゲームセンターんかいまい、うするうする入りみーたい゜。
うぬ当時、ゲームセンターんかい出入い゜っすぃ゜者ー、い゜ばゆる「不良」てぃーみぃ゜なさり、学校どぅまい児童ぬ出入い゜ゆくぱふ禁ずぃ゜うたい゜。
実際、素行ぬ良ふにゃーん中高生や怪すぃ゜ぎな大人ぬきゃーぬたまい゜場とぅなりうり、中ータバコぬ煙しモクモクしーうたい゜すぃ゜、すのうい壁ぬかまくまんな半裸ぬみどぅむ゜ぬヌード写真ぬ何枚まい貼りあい゜たい゜。
・・・教育上、い゜はずぃ゜がにゃーん。
好奇心から入りみーたい゜良作やたい゜が、一度入い゜たい゜だきしたふさんどぅあった。
うぬ場んかいうい゜たい゜「人種」んかいまい嫌悪感ぬうぶい、いば店内ぬ異様ぬ空気感とぅ息苦すぃ゜さんかいい゜たたまりなふない゜たい゜ぬやん。
くまー学校側ぬあい゜ようにぃ゜、どぅーぬうい゜びきぃ゜とぅくるやあらんやー、てぃー体し理解でぃきぃ゜たい゜ぬでぃある。
かいがくまんかい入い゜くとー、二度とぅにゃーったん。
