処女作『たからもの』～ 宮古語バージョン❤️

第４０章でぃある

　「美絵子ちゃん・・・のーてぃが・・・？」

　痛みぃ゜んかい耐いがつぃ゜な立つぃ゜上がい゜たい゜良作ぬみーんかえー、ばんない遠ざかりい゜きぃ゜美絵子ぬ前方んかい・・・そう、ちょうどぅ「Ｕかー」んかい架かい゜ぱすぃ゜ぬあたい゜んかい、美絵子同様、なつぃ゜かすぃ゜ぴぃ゜とぅが姿ぬ・・・。

　「あ・・・鈴木しんしー！？」

　（良作君・・・）

　・・・良作ぬかなまい゜ぬ中し、しんしーがかぬきぃ゜むかぎくいぬくだまっすぃ゜。

　すすぃ゜てぃ、美絵子ーしんしーがとぅくまん・・・。

　しんしーが表情ー・・・んざがらーさびぃ゜すぃ゜ぎやたい゜。

　しんしーとぅてぃーゆつぃ゜なぎぃ゜たい゜美絵子が、一度良作んかい悲すぃ゜ぎやー・・・すすぃ゜てぃしんしー同様、さびぃ゜すぃ゜ぎな顔ゆ向き、二じのーきぃ゜びぃ゜すぃ゜う返すぃ゜とぅ、良作から、ゆっふい゜とぅとぅりーてぃーんかい遠ざかりい゜きぃ゜たい゜。

　（良作君・・・良作君、ぐみんに・・・まーんてぃー、ぐみんに・・・ばに・・・）

　呆然とぅ立つぃ゜尽ふすぃ゜良作ぬかなまい゜ぬ中んかい、またむしんしーがくいぬくだまぬ響きぃ゜。

　二人がさびぃ゜すぃ゜ぎな後る姿ぬ、すぃ゜ーーーっとぅ良作ぬ視界から消いい゜きぃ゜。

　「・・・しんしーぇ！！　美絵子ちゃーーーん！！　・・・んざんかいい゜きぃ゜んさーいぉ！？　のーてぃが・・・のーてぃが・・・」

　・・・かいが次にぃ゜みすりたい゜とぅきぃ゜・・・すこー、病室ぬベッドぬ中やたい゜。