第２６章でぃある
会場んかい立つぃ゜尽ふすぃ゜良作。
すすぃ゜てぃかいぬみーや、かぬ日美絵子が書きふぃーたい゜「愛ぬメッセージ」ゆ掲ぎたい゜笹ぬあい゜たい゜とぅくるんかい・・・。
良作がうなだり、美絵子んかいぬ懺悔ぬ気持つぃ゜う新たんかいしーうたい゜とぅきぃ゜、背後しくいぬっすぃ゜たい゜。
すくんかえー、美絵子ぬ担任ぬ鈴木教師ぬ立ちうたい゜。
体育館ぬ放送室どぅ、残りあとぅ片付きゅーしーうたい゜ぬやん。すすぃ゜てぃ、二階んかいあい゜うぬ部屋ぬ窓から、良作ぬ様子ゆずぃ゜っとぅ見つぃ゜みうたい゜ぬでぃある。
「・・・高田君、するする教室んかい戻らでぃ。」
あすぃ゜が良作ー、しんしーんかいうながさりゃーまい会場ゆ去らでぃとぅすーったん。
「しんしーに、高田君ぬんなまぬ気持つぃ゜ぬ、ゆーどぅ分かい゜ばけ。くまんな、峯岸さんが想い゜出ぬあい゜ぬさぁに。大切ぬ想い゜出ぬ・・・。」
「しんしー・・・美絵子ちゃんなんなま・・・」
良作があい゜かけい゜とぅ、しんしーやうぬ言葉ゆしぇーぎぃ゜い゜、良作ゆずぃ゜っとぅ見つぃ゜みたい゜。
かいがのーゆどぅーんかい尋にぶっさぬかー、痛い゜ふどぅ分かりうたい゜ぬやん。
「ううん。だみさぁ、良作君。んなまー、まだだみ。すっとぅしーうきあぎ。
に、ばかい゜ぱずぃ゜？ 峯岸さん、まだ傷ぬ癒（い゜）いうらんばけさぁ。」
・・・しんしーがみーんかえー、なだぬ。
すすぃ゜てぃひとぅすぃ゜ずぃ゜・・・すーっとぅしんしーがふふゆ伝ー。
「しんしーんかえー分かい゜さぁ。きぃ゜っとぅ、かぬ日ぬ良作君、魔ぬさしーにゃーんばけさぁに。やらーまいに、んなま二人が会ーつぃ゜かー、むっとぅつぃ゜らふなっちゃーんやあらんかやー・・・？ だから良作君、んなまちゃーんな、すっとぅしーあぎふすぃ゜い゜ばけ。しんしーからぬう願い゜・・・。」
良作ぬみーんかいまい、なだぬあふりたい゜。
「い゜い゜ばけさぁ、良作君。思い゜切い゜泣きい゜い゜ばけ。すすぃ゜てぃ、傷ぬ癒えい゜がみ待ちあぎに。時間が・・・きぃ゜っとぅ時間ちゃーんが解決しーふぃーい゜さぁ。」
そうあっずぃ゜、しんしーや良作ゆぎゅっとぅ抱きぃ゜すぃ゜みたい゜。
良作ー、美絵子ぬ最後ぬメッセージゆゆむ゜たい゜とぅきぃ゜とぅ同ずぃ゜ようにぃ゜、しんしーが胸し思い゜切い゜泣きぃ゜たい゜。
