第１６章でぃある
学芸会ぬ翌日ぬくとぅ。
体調不良ぬのーらんまま、良作ー無理ゆうし登校っすぃ゜たい゜。むつぃ゜るん、愛すぃ゜ぬ美絵子んかい会ーたみやん。
休みぃ゜時間ー、午前中ぬ「中休（なかやすぃ゜）みぃ゜」てぃー、昼食後ぬ「昼休みぃ゜」があい゜が、うぬ「中休みぃ゜」んかい事件ーうきたい゜。
とぅない゜ぬ四年生ぬ教室ぬ、ぬーがらんぎゃますぃ゜ーんぎゃますぃ゜。
良作が何気なふ中ゆぬずきぃ゜とぅ、かぬ大山茂晴がむ゜ーなんかい囲まりからかーりうい゜。
・・・見ーい゜とぅ、小便ゆむらすぃ゜たい゜大山が、あうみぱなし突っ立ちうい゜、みどぅむ゜やらび数人が大山ぬ濡りたい゜ズボンゆういび差しゲラゲラばらいうい゜やあらんか・・・！
「すぃ゜ぎちゃん、みぃ゜っとぅむねいさぁやー、四年生んかいまいなりうむらすぃ゜しーよお！」
「大山！ 何回教室汚すぃ゜つぃ゜かー気ぬ済む゜んだい゜？ つぃ゜っとー掃除っすぃ゜身んかいまいなりみーるさぁ！！」
心無くくるなクラスメートぬびきやらびぬ言葉ぬ、うなだれい゜大山ぬきぃ゜むんかい突きぃ゜刺さい゜。
良作ー、大山んかいかつぃ゜てぃ貴重ぬ情報ゆならーしむろーたい゜恩義ぬあい゜。うい以来、会話くすにゃーったんが、う互い゜似たい゜ような境遇（きぃ゜ょうぐう）でぃ苦労しーうい゜同志とぅすぃ゜てぃ、敬意ゆ抱きぃ゜関係やたい゜。
本来やらばどぅ、
「っう゛ぁら、ぱずぃ゜かふにゃーんぬか・・・？ かりゃー生まりつぃ゜きぃ゜こうい゜う体なんやん。どぅーしこう、からかーれい゜つぃ゜かー、どぅんな気持つぃ゜っすぃ゜！？」
てぃー四年生ゆ一喝（い゜っかつぃ゜）っすぃ゜とぅくまやんが・・・くぬ日ぬ良作ー違ーたい゜。
体調不良ー仕方にゃーんとぅすぃ゜てぃまい、のーてぃーか大山ゆ弁護っすぃ゜てぃーあい゜感情ぬ湧かったんぬやん。
かりゃーうぬ様子ゆ目ぬ当たい゜んかいっすぃ゜がつぃ゜な、あとぅからガヤガヤとぅヤジ馬ぬぐとぅふ集まりきぃ゜しヒソヒソささやきぃ゜、あるい゜は嘲笑っすぃ゜連中ゆ尻目んかい、うぬ場から逃ぎ出すぃ゜たい゜。
良作ー、大山ゆ「見殺すぃ゜んかいっすぃ゜たい゜」罪悪感んかいさい゜なまりがつぃ゜なまい、つぃ゜む゜だらーぬ大山ぬとぅくまんな、つぃ゜い゜にぃ゜戻らったん。
すすぃ゜てぃ、っふぁ気持つぃ゜し夢遊病者ぬようにぃ゜、うぬぱぎぃ゜し鉄棒エリアし待つぃ゜美絵子ぬとぅくまんかい向こーたい゜ぬでぃある。
