第５章でぃある
ばーやーピンゆすっとぅ引っぱい゜たい゜。
ぱびい゜ーんや乾きうたい゜ぬでぃ、形ー崩りったん。
ばーやーうりゅーてぃーぬぴぃ゜さんかいぬーし、エーミールぬ部屋から持つぃ゜出すぃ゜たい゜。
うぬとぅきぃ゜、さすぃ゜ずぃ゜みばーやー、大きぃ゜な満足感ぬふかのーまい感ずぃ゜うらったん。
ぱびい゜ゆ右手んかい隠し、ばーやー階段ゆうりたい゜。
うぬとぅきぃ゜やん。
下ぬ方からとーかばが方んかい上がりきぃ゜すぃ゜ぬどぅきぃ゜かいたい゜。
うぬ瞬間んばが良心ーみすりたい゜。
ばーやー突然、どぅーや盗みぃ゜うっすぃ゜たい゜、下劣ぬやつぃ゜やんてぃーあい゜くとぅー悟い゜たい゜。
同時にぃ゜、見つぃ゜かい゜ーすーんかてぃーあい゜うとぅるすぃ゜不安にぃ゜襲あーり、ばーやー本能的にぃ゜、獲物ゆ隠しうたい゜てぃーゆ、上着ぬポケットんかい突っ込む゜たい゜。
ゆっふい゜とぅばーやーあい゜きぃ゜続きたい゜が、大すりたい゜恥ずぃ゜びきぃ゜くとぅーっすぃ゜たい゜てぃーあい゜、ぴぃ゜ぐる気持つぃ゜んかい震いうたい゜。
上がりきぃ゜すぃ゜たい゜かしーさんとぅ、びぃ゜ふびぃ゜ふっすぃ゜がつぃ゜なすぃ゜り違あいってぃから、ばーやーんみゅーどぅきぃ゜どぅきぃ゜すーし、額んかいあしゅーかきぃ゜、落つぃ゜着きぃ゜う失ー、どぅー自身んかいうびぃ゜いがつぃ゜な、やーぬ入口んかい立つぃ゜止まい゜たい゜。
すぃ゜ぐにぃ゜ばーやー、くぬぱびい゜ゆむちうりーならん、むとぅんかい返し、でぃきぃ゜い゜つぃ゜かーのーぐとぅまいにゃーったんよーんしーうかにばならん、てぃー悟い゜たい゜。
すくでぃ、ぴぃ゜とぅんかい出ふばし見つぃ゜かい゜ーすーんか、てぃーあい゜くとぅー極度にぃ゜恐りがつぃ゜なまい、急ぎ引きぃ゜返すぃ゜、階段ゆ駆き上がい゜、一分ぬ後んなまたエーミールぬ部屋ぬ中んかい立ちうたい゜。
ばーやーポケットからてぃーゆいだすぃ゜、ぱびい゜ゆ机ぬういんかい置きぃ゜たい゜。
うりゅーゆーどぅ見ーんまーにぃ゜、ばーやーんやどぅんな不幸ぬ起くい゜たい゜かてぃーあい゜くとぅーすぃ゜ーたい゜。
すすぃ゜てぃ泣かんばかーい゜やたい゜。
ヤママユガー潰りにゃーんぬやん。
前羽ぬぴぃ゜てぃつぃ゜とぅ触角ぬ一本なふなりうたい゜。
つぃ゜ぎぃ゜りたい゜羽ゆ用心深ふポケットから引きぃ゜出さでぃとぅっすぃ゜とぅ、羽ーばらばらんかいなりうり、繕ーくとぅぬきゃー、んやうむいまいゆらったん。
盗みぃ゜うっすぃ゜たい゜てぃーあい゜気持つぃ゜ゆい゜、どぅーぬ潰しにゃーん美すぃ゜い゜みずぃ゜らすぃ゜ぱびい゜ゆ見ーうい゜ほうが、ばがきぃ゜むゆ苦すぃ゜みたい゜。
微妙ぬとぅびぃ゜色がかい゜たい゜羽ぬくーぬ、どぅーがういびんかいふっつぃ゜きうい゜ぬゆ、ばーやー見ーたい゜。
また、ばらばらんかいない゜たい゜羽ぬすくんかい転がりうい゜ぬゆ見ーたい゜。
うりゅーすぃ゜っかい゜むとぅどおい゜んかいっすぃ゜くとぅがでぃきぃ゜い゜つぃ゜かー、ばーやーどぅんな持つぃ゜物やらーまい楽すぃ゜みぃ゜やらーまい、喜び投ぎ出すぃ゜たるう。
悲すぃ゜気持つぃ゜しばーやーやーんかいぴい゜、夕方がみうつぃ゜ぬいみ庭ぬ中んかい腰かきうたい゜が、つぃ゜い゜にぃ゜一切ゆあんなんかいうつぃ゜明けい゜勇気ゆ起くすぃ゜たい゜。
あんなー驚きぃ゜悲すぃ゜む゜たい゜が、すぃ゜でぃにぃ゜くぬ告白ぬ、どぅんな罰ゆ忍びぃ゜くとぅゆい゜、ばにぃ゜とぅってぃつぃ゜らくとぅやたい゜てぃーあい゜くとぅー感ずぃ゜たい゜らすぃ゜かった。
「っう゛ぁー、エーミールぬとぅくまん行かにばない゜ましん。」てぃーあんなーきぃ゜っぱい゜てぃーあい゜たい゜。
「すすぃ゜てぃ、どぅーしそうあい゜ざだなしぇーない゜ましん。ういゆい゜ふかん、どうすぃ゜ようまいあい゜ましん。っう゛ぁがむちうい゜むぬぬうつぃ゜から、んじかゆ埋み合ばしんかいゆい゜抜きむろーよーん、申すぃ゜出い゜ぬさい。すすぃ゜てぃ許しむろーよーん頼まにばない゜ましん。」
かぬ模範びきやらびでぃなふてぃ、他ぬどぅすぃ゜やらばどぅ、すぃ゜ぐにぃ゜そうっすぃ゜気んかいなりたい゜ぱずぃ゜。
かいがばがあい゜くとぅーばかりふぃーんすぃ゜、うすらふ全然信ずぃ゜でぃてぃーまいすーんぱずぃ゜てぃーあい゜くとぅー、ばーやー前むってぃ、はっきぃ゜い゜感ずぃ゜うたい゜。
