第４章でぃある
エーミールぬくぬ不思議ぬぱびい゜ゆむちうい゜てぃーあい゜くとぅーきぃ゜きぃ゜とぅ、ばーやーすぃ゜っかい゜興奮しーすぃ゜まい、ういが見ーらいい゜とぅきぃ゜ぬきぃ゜すぃ゜ぬどぅ待つぃ゜きぃ゜りなふない゜たい゜。
食後、外出ぬでぃきぃ゜い゜よーんない゜とぅ、すぃ゜ぐばーやー中庭ゆくい、とぅない゜ぬやーぬ四階んかい上がりい゜きぃ゜たい゜。
すくんかい例ぬしんしーがびきっう゛ぁー、小さい゜ながらどぅーちゃーんぬ部屋ゆむちうたい゜。
ういがばぬんなどぅぬばかーい゜羨ますぃ゜ふたたい゜かばからん。
途中どぅばーやー、とーんまい会あーったん。
ういんかいたどぅい゜着き、部屋ぬ戸ゆノックっすぃ゜たい゜が、返事ぬにゃーったん。
エーミーローうらったんぬやん。
ドアぬハンドルゆまーしみーい゜とぅ、入い゜口ー開きうい゜くとぅがばかい゜たい゜。
しみてぃ例ぬぱびい゜ゆ見ーぶっさてぃー、ばーやー中んかいぱい゜たい゜。
すすぃ゜てぃすぃ゜ぐんかい、エーミールぬ収集ゆすぃ゜まいうい゜ふたーつぃ゜ぬ大きぃ゜なぱくゆてぃーんかいとぅい゜たい゜。
んじぬぱくんかいまい見つぃ゜からったんが、やがてぃ、うぬぱびい゜ーんなだ展翅板んかい載りうい゜かむすぃ゜りんてぃー思い゜つぃ゜きぃ゜たい゜。
はたすぃ゜てぃすくんかいあい゜たい゜。
とぅびぃ゜色ぬビロードぬ羽ゆ細長紙きぃ゜りんかい張い゜んばさり、ヤママユガー展翅板んかい留みらりうたい゜。
ばーやーうぬういんかいかがみ、毛ぬ生いたい゜赤茶色ぬ触角や、優雅でぃ、果てぃすぃ゜なふ微妙ぬ色ゆっすぃ゜たい゜羽ぬ縁や、下羽ぬ内側ぬ縁んかいあい゜細羊毛ぬような毛などぅー、残らずぃ゜間近から眺みたい゜。
あい゜にぃ゜ふ、かぬ有名ぬ斑点ちゃーんな見ーらりったん。
細長紙きぃ゜りぬ下んかいなりうたい゜ぬやん。
んみゅーどぅきぃ゜どぅきぃ゜すーしがつぃ゜な、ばーやー紙きぃ゜りゆ取い゜ぬきぶっさ誘惑んかい負き、針ゆ抜きぃ゜たい゜。
すぃ゜るとぅ、ゆーつぃ゜ぬ大きぃ゜な不思議ぬ斑点ぬ、挿絵ぬゆい゜ーずぃ゜っとぅかぎふ、ずぃ゜っとぅすぃ゜ばらすぃ゜ふ、ばぬー見つぃ゜みたい゜。
うりゅー見ーい゜とぅ、くぬ宝ゆてぃーんかい入りぶっさてぃーあい゜逆ろーがた欲望ゆ感ずぃ゜、ばーやー生まり初みてぃ、盗みぃ゜う犯すぃ゜たい゜。
