4/7

第３章でぃある

　二年たち、ばんたー、んや大きぃ゜なびきやらびんかいなりうたい゜が、ばが熱情ーんなだ絶頂期んかいあい゜たい゜。

　うぬ頃、かぬエーミールぬヤママユガゆサナギからけーすぃ゜たい゜てぃーあい゜噂ぬ広まい゜たい゜。

　きゅー、ばが知人ぬ一人が、百万マルクゆ受き継ぎぃ゜たい゜とぅか、歴史家ぬリヴィウスぬなふない゜たい゜本ぬ発見すーりたい゜とぅかい゜うくとぅーきぃ゜きぃ゜たい゜とぅすぃ゜てぃまい、うぬとぅきぃ゜ふどぅばーやー興奮すーんぱずぃ゜。

　ばんたが仲間し、ヤママユガゆ捕れーたい゜むのーんなだにゃーったん。

　ばーやーどぅーがむちうたい゜ふい゜ぱびい゜ぬ本ぬ挿絵し見ーたい゜くとぅあい゜だきやたい゜。

　名前ゆっしうい゜がつぃ゜などぅーがぱくんかいんなだにゃーんぱびい゜ぬ中し、ヤママユガふどぅばが熱心にぃ゜ぷすぃ゜がりうたい゜むのーにゃーったん。

　いふんとぅなふばーやー、本ぬ中ぬかぬ挿絵ゆ眺みたい゜。

　一人がどぅすぃ゜ーばぬんかいこう語い゜たい゜。

　「とぅびぃ゜色ぬくぬぱびい゜ぬ、木ぬ幹やしーんかい止まりうい゜とぅくまゆ、とぅい゜や他ぬ敵ぬ攻撃すーでぃとぅっすぃ゜とぅ、ぱびい゜ー畳みうい゜黒みぃ゜がかい゜たい゜前羽ゆ広ぎ、かぎ後る羽ゆ見せい゜だきやんが、うぬ大きぃ゜な光い゜斑点ー非常にぃ゜不思議ぬ思い゜がきん外観ゆ呈っしば、とぅい゜ー恐りゆなし、手出すぃ゜うやみすぃ゜もー。」てぃー。