序章でぃある
客ー夕方ぬ散歩からぴり、ばが書斎しばがすばんかい腰かきうたい゜。
ぴぃ゜ーまぬあかさー消いうしでぃてぃーしーうたい゜。
窓ぬ外んかえー、色あしたい゜湖ぬ、丘ぬ多岸んかい鋭ふ縁とぅらり、あがたふかなたがみ広がりうたい゜。
ちょうどぅ、ばが末ぬびきやらびぬ、うやすぃ゜みぃ゜うあい゜たい゜とぅくまやたい゜ぬでぃ、ばんたーやらびや幼日ぬ思い゜出にぃ゜つぃ゜い゜てぃ話すぃ゜合ーたい゜。
「やらびぬでぃきぃ゜ってぃから、どぅーが幼年時代ぬい゜るい゜るぬ習慣や楽すぃ゜みぃ゜ぐとぅがまたゆみぃ゜げーりきぃ゜すぃ゜たい゜さぁ。
すりどぅくるか、一年まいから、ばーやーまた、チョウチョ集みゅーやりうい゜さぁ。うみーんかいかきでぃか。」てぃーばーやーあい゜たい゜。
かいが見しふすぃ゜い゜てぃーあい゜たいばどぅ、ばーやー収集ぬぱりうい゜軽厚紙ぬぱくゆ
とぅい゜が行きぃ゜たい゜。
最初ぬぱくゆ開きみー、初みてぃ、んやすぃ゜っかい゜っふぁふなりうい゜ぬんかい気ずぃ゜きぃ゜、ばーやーランプゆとぅりマッチゆ擦い゜たい゜。
すぃ゜るとぅ、たつぃ゜まつぃ゜外ぬ景色ー闇んかい沈みすぃ゜もー、窓い゜っぱい゜ん不透明ぬあう夜色んかい閉ざさりにゃーん。
ばがチョウチョー、あかランプぬぴぃ゜かい゜ゆ受き、ぱくぬ中から、きぃ゜らびぃ゜やかにぃ゜光い゜輝きぃ゜たい゜。
ばんたーうぬういんかい体ゆかがみ、かぎ形や濃みぃ゜ぐとぅぬ色ゆ眺み、ぱびい゜ぬ名前ゆあい゜たい゜。
「くえーワモンキシタバし、ラテン名ーフルミネア。くくらしぇーぐふみずぃ゜らすぃ゜やつぃ゜やん。」てぃーばーやーあい゜たい゜。
どぅすぃ゜ーぴぃ゜てぃつぃ゜ぬぱびい゜ゆ、ピンぬ付きぃ゜たい゜まま、ぱくぬ中から用心深ふ取い゜出すぃ゜、羽ぬ裏側ゆ見ーたい゜。
「妙ぬむぬやん。チョウチョゆ見ーい゜ばかーい゜、幼年時代ぬ思い゜出ゆつーふすすらいい゜むのーにゃーん。ばーやーいみびきやらびぬ頃熱情的な収集家やたい゜むぬやん。」てぃーかりゃーあい゜たい゜。
すすぃ゜てぃチョウチョゆまたむとぅぬとぅくるんかい刺すぃ゜、ぱくぬ蓋ゆ閉ずぃ゜、「んや、きっこう。」てぃーあい゜たい゜。
うぬ思い゜出ぬ不愉快でぃでぃまいあい゜かぬよーん、かりゃー口早にぃ゜そうあい゜たい゜。
うぬ直後、ばがぱくゆすぃ゜まいむどぅりきぃ゜すぃ゜とぅ、かりゃー微笑しー、巻きぃ゜たばくゆばぬんかい求みたい゜。
「悪ふうむあだなしふぃーたい゜めー。」てぃー、ういからかりゃーあい゜たい゜。
「っう゛ぁが収集ゆゆーどぅ見ーったんすぃ゜が、ばんまいやらびぬとぅきぃ゜、むるん収集しーうたい゜ぬやんが、残念ながら、どぅーしうぬ思い゜出ゆ汚しにゃーん。実際ぱなすぃ゜ぬまいぱずぃ゜かすぃ゜くとぅやんが、ぴぃ゜てぃつぃ゜きぃ゜きむらーでぃ。」
かりゃーランプぬふやぬういどぅたばくんかいぴーゆつぃ゜き、緑色ぬかさゆランプんかいぬーしたい゜。
すぃ゜るとぅ、ばんたがみぱなー、快薄暗がい゜ぬ中んかい沈む゜たい゜。
かいが開きぃ゜たい゜窓ぬ縁んかい腰かけい゜とぅ、かいぬ姿ー、外ぬ闇からふとぅんどぅ見分きぬつぃ゜かったん。
ばーやー葉巻ゆ吸ーたい゜。
外しぇーふなたぬあがたからかん高ふ、闇一面んかい鳴きうたい゜。
どぅすぃ゜ーすぬ間ん次ぬよーん語い゜たい゜。
